Молитвы

О умножении любви, о ненавидящих и обидящих нас

 


О умножении любви и искоренении ненависти и всякой злобы

Тропарь, глас 4-й
Союзом любве апостолы Твоя связавый, Христе, и нас Твоих верных рабов к Себе тем крепко связав, творити заповеди Твоя и друг друга любити нелицемерно сотвори, молитвами Богородицы, Едине Человеколюбче.

Кондак, глас 5-й
Пламенем любве распали к Тебе сердца наша, Христе Боже, да тою разжигаеми, сердцем, мыслию же и душею, и всею крепостию нашею возлюбим Тя, и искренняго своего яко себе, и повеления Твоя храняще славим Тя, всех благ Дателя.




О ненавидящих и обидящих нас

Тропарь, глас 4-й
О распенших Тя моливыйся, любодушне Господи, и рабом Твоим о вразех молитися повелевый, ненавидящих и обидящих нас прости, и от всякаго зла и лукавства к братолюбному и добродетельному настави жительству, смиренно мольбу Тебе приносим; да в согласном единомыслии славим Тя. Единаго Человеколюбца.

Кондак, глас 5-й
Якоже первомученик Твой Стефан о убивающих его моляще Тя, Господи, и мы припадающе молим, ненавидящих всех и обидящих нас прости, во еже ни единому от них нас ради погибнути, но всем спастися благодатию Твоею, Боже всещедрый.




МОЛИТВА СВЯТЫМ МУЧЕНИКОМ И ИСПОВЕДНИКОМ ГУРИЮ, САМОНУ И АВИВУ
О преславнии мученицы Гурие, Самоне и Авиве! К вам, яко скорым помощником и теплым молитвенником, мы немощнии и недостойнии прибегаем, усердно моляще: не презрите ны, во многая беззакония впадшыя и по вся дни и часы согрешающыя: наставите на путь правый заблуждшыя, исцелите страждущыя и скорбящыя: соблюдите ны в непорочнем и целомудреннем житии: и якоже древле, тако и ныне покровителие супружеств пребудите, в любви и единомыслии сия утверждающе и от всех злых и бедственных обстояний избавляюще: защитите, о многомощнии исповедницы, вся православныя христианы от напастей, злых человек и козней демонских: оградите я от нечаянныя смерти, умоляюще всеблагаго Господа, да великия и богатыя милости нам смиренным рабом Своим пробавит: несмы бо достойни нечистыми устнами призывати великолепое имя Создателя нашего, аще не вы, святии мученицы, за ны ходатаи будете: сего ради к вам прибегаем и предстательства вашего пред Господем о нас просим: такожде избавите нас от града, потопа, огня, меча, нашествия иноплеменных, междоусобныя брани, смертоносныя язвы и всякаго душепагубнаго обстояния: ей, страстотерпцы Христовы, устройте нам молитвами вашими вся благая и полезная, да благочестно житие временное прешедше и кончину непостыдну стяжавше, удостоимся тёплым заступлением вашим со всеми святыми одесную правосуднаго Бога судии стати и Того непрестанно славити со Отцем и Святым Духом во веки веков.

Вернуться на заглавную страницу